काठमाडौं : प्रमुख प्रतिपक्षी दल नेपाली कांग्रेसका सभापति गगनकुमार थापाले संघीय सरकारले गरेको गलत कामहरू प्रदेश र स्थानीय सरकारहरूले गर्न दोहोर्याउन नहुने बताएका छन् ।
पार्टी केन्द्रीय कार्यालय सानेपामा आयोजित ‘ग्रिन टेबल’ छलफल श्रृंखलाअन्तर्गत सुकुम्वासी समस्या सम्बन्धी कार्यक्रममा सभापति थापाले संघीय सरकारले गरेका कमजोरी प्रदेश र स्थानीय सरकारले दोहोर्याउन नहुने स्पष्ट सन्देश दिएका हुन् ।
उनले सुकुम्वासी तथा अव्यवस्थित बस्ती व्यवस्थापनका नाममा कानुनभन्दा बाहिर गएर डोजर चलाउने शैली स्वीकार्य नहुने स्पष्ट पारे ।
उनले डोजर चलाउने हल्ला र त्रासको पछि नलाग्न आग्रह गर्दै कानुन, नीति र योजनाका आधारमा मात्रै समस्या समाधान खोजिनुपर्नेमा जोड दिए । कानुनले दिएको अधिकारभन्दा बाहिर गएर केही पनि गर्नु नहुने उनले बताए ।
सभापति थापाले दशकौंदेखि जटिल बन्दै आएको सुकुम्वासी समस्या बल प्रयोगबाट नभई योजनाबद्ध र मानवीय ढंगले समाधान गर्नुपर्नेमा जोड दिए । वास्तविक सुकुम्वासीको पहिचान, सुरक्षित पुनर्वास, आधारभूत सेवाको सुनिश्चितता र दीर्घकालीन व्यवस्थापनलाई केन्द्रमा राखेर मात्रै कदम चाल्नुपर्ने उनको धारणा थियो।
सभापति थापाले पार्टीले यस विषयमा छुट्टै टोली बनाएर अनुगमन र मूल्यांकन गरिरहेको जानकारी दिँदै ग्रिन टेवलको छलफलबाट आएका सुझावका आधारमा सबै प्रदेश तथा स्थानीय सरकारलाई औपचारिक पत्राचार गरिने पनि जानकारी दिए ।
कांग्रेसले “ग्रिन टेबल” कार्यक्रममार्फत नीति निर्माण र जनसरोकारका विषयमा खुला संवाद अघि बढाउन थालेको छ । पार्टीभित्र मात्रै सीमित रहने परम्परागत छलफलभन्दा फरक शैलीमा विज्ञ र सरोकारवालासँग प्रत्यक्ष बहस सुरु गरिनुलाई राजनीतिक वृत्तमा अर्थपूर्ण पहलका रूपमा हेरिएको छ । राजनीतिक भाषणभन्दा समस्या समाधान केन्द्रित बहसमा जोड दिन खोजिएको कांग्रेसले जनाएको छ ।
