काठमाडौं : नेपाली कांग्रेसले गृहमन्त्री सुधन गुरुङसँग सम्बन्धित आरोपहरूको स्वतन्त्र, निष्पक्ष र उच्चस्तरीय छानबिन तत्काल अघि बढाउन सरकारसमक्ष माग गरेको छ ।

पार्टीका प्रवक्ता देवराज चालीसेले एक विज्ञप्ति जारी गर्दै गृहमन्त्री गुरुङसँग सम्बन्धित आरोपहरूको स्वतन्त्र र निष्पक्ष छानबिन तत्काल अघि बढाउन माग गरेका हुन् । यस विषयलाई ढिलाइ, प्रभाव वा ढाकछोपतर्फ लैजाने प्रयासले सुशासन र जनविश्वासमा गम्भीर असर पार्ने चेतावनी पनि दिइएको छ ।

गृहमन्त्री गुरुङविरुद्ध विवादास्पद व्यापारी दीपक भट्टसँग साझेदारी रहेको आरोप लागेको छ ।

पछिल्लो समय गृहमन्त्रीसँग जोडिएको प्रकरणले सार्वजनिक चासोसँगै राजनीतिक नैतिकता र पारदर्शितामाथि प्रश्न उठाएको कांग्रेसको ठहर छ । यस्तो अवस्थामा सम्बन्धित पदमा रहँदा अनुसन्धान प्रक्रियामा प्रभाव पर्न सक्ने आशंका रहने भएकाले स्वतन्त्र र प्रभावरहित छानबिनको वातावरण सुनिश्चित गर्नुपर्ने आवश्यकता औंल्याइएको छ ।