दोलखा : बागमती प्रदेश सरकारले निर्माण गरेको शैलुङको प्रतिक्षित पर्यटकीय संरचना गोलघर र कम्युनिटी लज अब औपचारिक रूपमा शैलुङ गाउँपालिकाको स्वामित्वमा आएको छ । मंगलबार (मंसिर २ गते) संस्कृति तथा पर्यटन मन्त्रालयले यी दुवै संरचनालाई स्थानीय तहलाई हस्तान्तरण गरेको हो ।

शैलुङ गाउँपालिका–१ मा रहेको आकर्षक गोलघर र वडा नं. ८ फस्कामा बनेको कम्युनिटी लज लामो समयदेखि पर्यटक कुर्दै थिए । गाउँपालिका अध्यक्ष रिमाल बाबू श्रेष्ठको निरन्तर पहलपछि यी संरचना प्रदेश सरकारको जिम्मेवारीबाट स्थानीय तहको जिम्मा आएको हो ।

हस्तान्तरण कार्यक्रममा बोल्दै अध्यक्ष श्रेष्ठले भने, “अब यी संरचना हाम्रै हातमा आएका छन् । हामी तुरुन्तै सञ्चालनमा ल्याएर शैलुङको पर्यटनलाई नयाँ उचाइ दिन्छौँ । यहाँ आउने हरेक पाहुनालाई गुणस्तरीय सेवा दिने, स्थानीयलाई रोजगारी सिर्जना गर्ने र गाउँकै उत्पादनलाई बजारसम्म पुर्‍याउने हाम्रो मुख्य लक्ष्य हो ।”

पर्यटन पूर्वाधार तथा हस्तान्तरण कार्यविधि–२०८१ अनुसार भएको यो हस्तान्तरणले शैलुङ क्षेत्रको होमस्टे, स्थानीय खाना र हस्तकलालाई थप प्रवर्द्धन गर्ने अपेक्षा गरिएको छ ।

गाउँपालिकाले अबको केही साताभित्रै गोलघर र कम्युनिटी लज पूर्ण रूपमा सञ्चालनमा ल्याउने जनाएको छ । “शैलुङ आउने जो–कोहीलाई अब घरजस्तै महसुस हुने गरी सेवा दिन्छौँ,” गाउँपालिका उपाध्यक्षले थपिन् ।

हिमालको काखमा रहेको शैलुङ दोलखा र रामेछापको सिमानामा पर्छ र पछिल्लो समय आन्तरिक तथा बाह्य पर्यटकको रोजाइमा परिरहेको छ । यी नयाँ संरचनाले यहाँको पर्यटकीय चहलपहललाई अझ बढाउने विश्वास स्थानीयको छ ।