काठमाडौं : सर्वोच्च अदालतले भरतमणि दाहालको पक्राउबारे सरकारका नाममा कारण देखाऊ आदेश जारी गरेको छ ।

न्यायाधीश कुमार रेग्मीको एकल इजलासले दाहाललाई बन्दीसहित २४ घण्टाभित्र अदालतमा उपस्थित गराउन र लिखित जवाफ पेस गर्न निर्देशन दिएको हो । अदालतले आदेश प्राप्त भएको मितिबाट बाटाको म्यादबाहेक सो समयसीमाभित्र अनुसन्धान सम्बन्धी सम्पूर्ण मिसिल समेत पेश गर्न भनेको छ ।

दाहाल गत आइतबार मोरङको बेलबारीबाट प्रहरीले पक्राउ गरेको थियो । उनको पक्राउपछि छोरी डेनिका दाहालले सर्वोच्च अदालतमा बन्दीप्रत्यक्षीकरणको निवेदन दर्ता गराएकी थिइन् ।

भूराजनीतिक विषय र उच्चस्तरीय राजनीतिक संलग्नताबारे दिएको विवादास्पद अन्तर्वार्ता सामाजिक सञ्जालमा भाइरल भएपछि उनलाई साइबर अपराधको आरोपमा नियन्त्रणमा लिइएको प्रहरी स्रोतले जनाएको छ ।