काठमाडौं : उच्च अदालत पाटनले पूर्वसभामुख कृष्णबहादुर महरालाई धरौटीमा छाड्न आदेश दिएको छ । न्यायाधीशद्वय तेजेन्द्रप्रसाद शर्मा र अर्जुनप्रसाद कोइरालाको संयुक्त इजलासले महरालाई २० लाख रुपैयाँ धरौटीमा छाड्न आदेश दिएको हो ।

महरालाई सीआईबीले असोज २६ मा नियन्त्रणमा लिएको थियो । २०७९ पुस १० मा फ्लाई दुबईको विमानबाट आएका चिनियाँ नागरिक लि हानसोङले ल्याएको दुई सुटकेशमा ७३० भेपमार्फत ८ करोड ५५ लाख बराबरको सुन तस्करी भएको थियो । भन्सारका नासु रेवन्त खड्कासहितको मिलेमतोमा सुन बेचेको अनुसन्धानले देखाएको थियो ।

उक्त सुन छुटाउन महराले दबाब दिएको आरोप छ । उनका छोरा राहुल महरा यसअघि नै पक्राउ परेर जेल चलान भएका थिए । भेप साटिएको शंका लागेपछि भन्सारले सीआईबीलाई अनुसन्धानको जिम्मा दिएको थियो । दुई महिनाको छानबिनपछि सीआईबीले ९ किलो सुन तस्करी भएको निष्कर्ष निकाल्दै ६ जनाविरुद्ध मुद्दा दायर गरेको थियो ।