काठमाडौं : जनकपुर बोल्ट्सले नेपाल प्रिमियर लिग (एनपिएल)मा पहिलो जित हात पारेको छ । काठमाडौं गोर्खाजलाई ८ विकेटले पराजित गर्दै जनकपुरले प्रतियोगितामा पहिलो जित हात पारेको हो ।
काठमाडौंले दिएको ११६ रनको लक्ष्य जनकपुरले १७.२ ओभरमा २ विकेट गुमाउँदै पूरा गर्यो । जनकपुरका लागि मोइन अलीले अर्धशतकीय इनिङ खेले । उनले ५१ बलमा ३ चौका र ३ छक्काको सहयोगमा अविजित ५८ रन बनाए । सेफ हसनले ३९ बलमा ३ छक्का र १ चौकाको सहयोगमा अविजित ४० रन बनाए । काठमाडौंका लागि रिपन मन्डलले १ विकेट लिए ।
त्यसअघि कीर्तिपुरस्थित त्रिवि क्रिकेट मैदानमा टस जितेर पहिले ब्याटिङ गरेको काठमाडौं १९.३ ओभरमा ११५ रन मात्र बनाउँदै अलआउट भएको थियो ।
काठमाडौंका लागि भिम सार्कीले सर्वाधिक ३३ रन बनाए । २९ बल खेलेका उनले ४ चौका प्रहार गरे । रासिद खानले १४ बलमा २ चौकाको सहयोगमा १७ रन बनाए । ओपनर स्मित पटेलले १३ रन बनाउँदा सुमित महर्जनले १० रन जोडे । यसबाहेक काठमाडौंका अन्य खेलाडीले दोहोरो अंकमा रन जोड्न सकेनन् ।
जनकपुरका लागि राहुल यादव एक्लैले ४ विकेट लिए । सेफ हसनले २ विकेट लिँदा ललित राजवंशी, मोइन अली र हरमित सिंहले समान १-१ विकेट लिए ।
-1786876684.jpeg)
