काठमाडौं : नेपाली कांग्रेस केन्द्रीय निर्वाचन समितिले पार्टीको १५औं केन्द्रीय महाधिवेशन अन्तर्गत पहिलो चरणको विभिन्न तह र निकायको निर्वाचनको विस्तृत समयतालिका सार्वजनिक गरेको छ । निर्वाचन समितिका संयोजक प्रेमबहादुर खड्काले पत्रकार सम्मेलन गरेर संशोधित कार्यतालिका सार्वजनिक गरेका हुन् ।
पार्टी केन्द्रीय कार्यसमितिको २०८२ चैत्र ११ गतेको निर्णय बमोजिम आगामी २०८३ असोज १६ देखि १९ गतेसम्म केन्द्रीय महाधिवेशन सम्पन्न गर्ने वैधानिक दायित्वलाई मध्यनजर गर्दै यो नयाँ कार्यतालिका ल्याइएको हो ।
यसअघि केन्द्रीय कार्यसमितिको २०८३ साउन २४ देखि भदौ १ गतेसम्म बसेको बैठकको निर्देशन र निर्वाचन समितिको भदौ २ गतेको निर्णय अनुसार भदौ २४ गतेदेखि वडा अधिवेशन सुरु गर्ने गरी परिमार्जित कार्यतालिका सार्वजनिक गरिएको थियो ।
तर, २०८३ भदौ १० गते रसुवाको भोटेकोशीमा आएको भीषण बाढीले निम्त्याएको महाविपत्ति, जनधनको क्षति र विभिन्न जिल्ला तथा क्षेत्रबाट प्राप्त राय, सल्लाह र सुझावलाई ध्यानमा राखी पूर्व निर्धारित मितिमै केन्द्रीय महाधिवेशन सम्पन्न गर्ने गरी यो विस्तृत समयतालिका तय गरिएको समितिले जनाएको छ ।
