काठमाडौं : नेकपा (एमाले)की संसदीय दलकी उपनेता तथा पूर्वमन्त्री पद्मा अर्यालले मुलुकमा शान्ति सुरक्षा कायम गर्न र नागरिकको जिउधनको रक्षा गर्न सरकार पूर्ण रूपमा असफल भएको आरोप लगाएकी छन्।
प्रतिनिधि सभाको बिहीवारको बैठकमा विशेष समय लिएर बोल्दै अर्यालले साउन १० गते सुनसरीमा भएको हिंसात्मक झडप र त्यसबाट भएको मानवीय क्षतिप्रति दुःख व्यक्त गर्दै सरकारको भूमिकामाथि प्रश्न उठाइन्। उनले दङ्गा नियन्त्रण बल प्रयोगबाट होइन, संवाद र विश्वासमार्फत समाधान खोजिनुपर्ने बताउँदै राज्यले संयमता अपनाउन नसकेको आरोप लगाइन्। बरु, त्रास सिर्जना गरेर अवस्था थप जटिल बनाइएको उनको भनाइ थियो।
उक्त घटनामा ज्यान गुमाएका ओमप्रकाश मेहताप्रति श्रद्धाञ्जली अर्पण गर्दै अर्यालले घाइतेहरूको निःशुल्क तथा प्रभावकारी उपचारको व्यवस्था गर्न सरकारसँग माग गरिन्। उनले विगतमा यस्तै घटनामा तत्कालीन सरकारलाई दोषी देखाउँदै राजीनामा माग्नेहरू नै अहिले सत्तामा रहेको स्मरण गराउँदै वर्तमान नेतृत्वले नैतिक जिम्मेवारी लिनुपर्ने बताइन्।
अर्यालले प्रधानमन्त्री र गृहमन्त्रीले घटनाको जिम्मेवारी लिँदै पदबाट राजीनामा दिनुपर्ने माग राखिन्। “देश सङ्कटमा पर्दा प्रधानमन्त्री बेखबरजस्तो देखिनु चिन्ताजनक हो,” उनले भनिन्, “नेतृत्वले जनताको बीचमा पुगेर संवाद गर्नुपर्छ, पद सिंहदरबार सजाउनका लागि मात्र होइन।”
उनले विगत दुई महिनादेखि उठाइएका प्रश्नमा प्रधानमन्त्रीबाट सन्तोषजनक जवाफ नआएको गुनासो गरिन्। साथै, संसद्मा व्यक्त भएका आपत्तिजनक अभिव्यक्तिहरू सच्याउनुपर्नेमा पनि उनले जोड दिइन्। प्रधानमन्त्रीका केही अभिव्यक्तिले राष्ट्रिय सार्वभौमिकतामाथि आँच पुर्याएको उनको आरोप थियो।
यसैबीच, अर्यालले बाढी–पहिरो पीडितहरूको राहत तथा पुनर्स्थापनामा सरकारको ढिलासुस्तीप्रति असन्तुष्टि जनाइन्। सुकुम्बासी व्यवस्थापनका नाममा होल्डिङ सेन्टरमा राखेर पछि अमानवीय व्यवहार गरिएको भन्दै उनले सरकारको कार्यशैलीलाई गैरजिम्मेवार भएको टिप्पणी गरिन्।
सरकारले ठोस योजना ल्याएमा शान्ति र सद्भाव कायम गर्न एमाले सहकार्यका लागि तयार रहेको बताउँदै उनले त्यसतर्फ सरकार गम्भीर नभएको निष्कर्ष प्रस्तुत गरिन्।
