काठमाडौं : नेपाली कांग्रेस संसदीय दलका नेता भीष्मराज आङ्देम्बेले संसदमा संख्याभन्दा पनि उठाइने मुद्दा र विचार महत्त्वपूर्ण हुने बताएका छन् ।
शनिबार आयोजित नेपाल थारु संघको महाधिवेशनलाई सम्बोधन गर्दै उनले संसदमा कांग्रेसको संख्या कम भए पनि आफूहरूले उठाउने जनसरोकारका मुद्दा प्रभावकारी हुने बताए । संख्याको बलमा मात्रै लोकतन्त्र सञ्चालन हुन नसक्ने उल्लेख गर्दै संसदीय दलका नेता आङ्देम्बेले संसदीय मर्यादा र लोकतान्त्रिक अभ्यासको संरक्षणका लागि कांग्रेसले आफ्नो भूमिका सशक्त रूपमा निर्वाह गर्ने स्पष्ट गरेका छन् ।
उनले पार्टी र संसदलाई अलग–अलग ढंगले हेर्ने प्रवृत्तिको अन्त्य गर्दै दुवैलाई एउटै सोच र ट्र्याकमा अघि बढाउने वातावरण निर्माण गरिएको दाबी गरे । कांग्रेसभित्र संसद र पार्टीबीच दूरी बढाउने तथा पार्टीलाई कमजोर बनाउने सोच विगतमा हाबी हुन खोजेको चर्चा गर्दै उनले भने, “त्यस्ता प्रवृत्तिलाई निस्तेज पार्दै अहिले पार्टी र संसदबीच बलियो समन्वय स्थापित गरिएको छ । संसदीय अनुभवमा हामी केही कम होला, तर पार्टी र संसदबीचको सहकार्यमार्फत संसदभित्र देखिएका समस्याको उचित समाधान खोजिरहेका छौँ ।”
संसदमा लोकतान्त्रिक मूल्य-मान्यता स्थापित गर्न कांग्रेसले निरन्तर आवाज उठाइरहने बताउँदै उनले संख्याको आधारमा संसदीय मर्यादा उल्लंघन गर्नेहरूलाई मुद्दा र विचारको महत्त्व बुझाउने उल्लेख गरे ।
