काठमाडौं : आइसिसी विश्वकप लिग–२ सिरिज अन्तर्गतको खेलमा घरेलु टोली नेपालले अमेरिकालाई ३१८ रनको विशाल लक्ष्य दिएको छ । कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको नेपालले निर्धारित ५० ओभरमा ८ विकेटको क्षतिमा ३१७ रन बनाएको हो ।
त्रिवि क्रिकेट मैदानमा नेपालले बनाएको यो योगफल अहिलेसम्मकै सर्वाधिक हो । यसअघि नेपालले २०२३ मा त्रिवि क्रिकेट मैदानमा ओमानविरुद्ध ३१० रन बनाएको थियो ।
नेपालका लागि डा. ईशान पाण्डे र दीपेन्द्रसिंह ऐरीले अर्धशतकीय इनिङ खेले । ईशानले सर्वाधिक ८४ रनको योगदान दिए । उनले ८३ बलमा ८ चौका र १ छक्का प्रहार गरे ।
दीपेन्द्रले ५९ रन बनाए । कप्तान रोहित पौडेलले ४६, आसिफ शेखले ४३, कुशल भुर्तेलले २९, गुलशन झाले १५ रन बनाए ।
अमेरिकाका लागि शुभम रन्जानेले ३ विकेट लिए भने रुसिल उगारकर र मिलिन्द कुमारले समान १-१ विकेट लिए ।
