काठमाडौँ : राष्ट्रिय स्वतन्त्र पार्टी (रास्वपा)का सांसद कृष्णकुमार कार्कीसँग जोडिएको विवादित विषय प्रतिनिधि सभामा उठेको छ ।
सोमबार बसेको प्रतिनिधि सभाको बैठकमा नेकपाकी सांसद पार्वती विकले उक्त विषयमा सरकार र सदनको ध्यानाकर्षण गराएकी हुन् ।
सांसद कार्कीमाथि एक विदेशी नागरिक महिलासँग सम्बन्धित व्यक्तिगत आचरणबारे सामाजिक सञ्जालमा विभिन्न आरोप सार्वजनिक भएको प्रसंग उल्लेख गर्दै सांसद विकले घटनाको यथार्थबारे स्पष्ट जानकारी आवश्यक रहेको बताइन् ।
उनले सामाजिक सञ्जालमा फैलिएका विषयवस्तुले नेपाल र नेपालीको अन्तर्राष्ट्रिय छविमाथि असर पार्न सक्ने चिन्ता व्यक्त गरिन् । सार्वजनिक पदमा रहेका व्यक्तिसँग सम्बन्धित यस्ता विषयले राष्ट्रिय प्रतिष्ठा र सामाजिक उत्तरदायित्वसँग समेत सम्बन्ध राख्ने उनको धारणा थियो ।
सांसद विकले आरोपबारे सत्य तथ्य छानबिन गरी सदनलाई जानकारी गराउन माग गर्दै घटना पुष्टि भए सम्बन्धित सांसदलाई कानुनी तथा संसदीय कारवाहीको दायरामा ल्याउनुपर्ने बताइन् ।
