काठमाडौं : कर्णाली याक्सविरुद्ध पाँच विकेटको सहज जितसँगै नेपाल प्रिमियर लिग (एनपीएल)मा काठमाडौं गोर्खाज प्लेअफनजिक पुगेको छ । प्रतियोगिताका काठमाडौंको यो चौथो जित हो । काठमाडौंले यसअघि पहिलो खेलमा जनकपुर बोल्ट्सविरुद्ध पाँच विकेटको जित निकालेको थियो ।
दोस्रो र तेस्रो खेलमा सुदूरपश्चिम रोयल्स र विराटनगर किंग्सविरुद्ध क्रमशः २९ र पाँच विकेटले पराजित भएको काठमाडौंले चौथो र पाँचौँ खेलमा लुम्बिनी लायन्स र चितवन राइनोजविरुद्ध २२ र ५३ रनको जित निकालेको थियो ।
यता, चौथो हार बेहोरेको कर्णालीको प्लेअफ यात्रा भने कठिन बनेको छ । कर्णाली यसअघि पहिलो खेलमा चितवन राइनोजसँग चार विकेटले पराजित भएको थियो । दोस्रो खेलमा लुम्बिनी लायन्सलाई नौ विकेटले हराएको कर्णालीले तेस्रो खेलमा सुदूरपश्चिम रोयल्ससँग ४५ रनको र चौथो खेलमा विराटनगरविरुद्ध तीन विकेटको हार बेहोरेको थियो ।
आइतबार कीर्तिपुरस्थित त्रिवि क्रिकेट रंगशालामा सम्पन्न खेलमा कर्णालीले प्रस्तुत गरेको १५० रनको लक्ष्य काठमाडौंले १८ ओभरमा पाँच विकेट गुमाएर पूरा गर्यो ।
शनिबार काठमाडौंलाई जित दिलाउन गेरहार्ड इरास्मसले सर्वाधिक ४३ रन बनाए । अविजित रहेका गेरहार्डले ६३–३ को स्थितीबाट जोन सिम्पसनसँग चौथो विकेटका निम्ति ८६ रनको साझेदारी गर्दै काठमाडौंलाई जितसम्म डोहोर्याएका हुन् ।
सिम्पसनले २१ बलमा चार चौका र दुई छक्कासहित ४१ रन जोडे । ओपनर बेन चाल्सवर्थले २१ बलमा दुई चौका र तीन छक्कासहित ३४ रन थपे । मिलिन्द कुमार १५ रनमा रनआउट भए । अर्का ओपनर आकाश त्रिपाठीले आठ रन बनाए । काठमाडौंका राशिद खान गोल्डेन डक भए ।
कर्णालीका नन्दन यादवले तीन विकेट लिए । पवन सर्राफले एक विकेट लिए ।
त्यसअघि टस जितेर ब्याटिङमा आएको कर्णाली निर्धारित २० ओभरमा सात विकेट गुमाएर १४९ रनको योगफल खडा गरेको थियो ।
कर्णालीका अलराउन्डर गुल्सनकुमार झाले आक्रामक ब्याटिङ गर्दै ४९ रन बनाए । उनले २२ बलमा ६ चौका र दुई छक्का प्रहार गरे । ८८–६ को स्थितिबाट करणले दीपक डुम्रेसँग सातौँ विकेटका निम्ति ५५ रनको साझेदारी गर्दै कर्णालीलाई सम्मानजनक लक्ष्यसम्म पुर्याएका थिए । दीपकले १० रन बनाए ।
पवन सर्राफले २९ बलमा दुई चौका र दुई छक्कासहित ३५ रन जोडे । ओपनर मार्क वाटले २७ बल खेल्दा एक चौका र दुई छक्कासहित ३० रन बनाए । अर्का ओपनर प्रियांक पन्चाल भने ‘रोयल डक’ भए । खेलको पहिलो बलमै काठमाडौंका कप्तान करण केसीले ‘कट एन्ड बोल्ड’ गरे ।
विलियम बोसिस्टोले एक र कप्तान सोमपाल कामीले ६ रन थपे ।
काठमाडौंका राशिद खानले दुई विकेट लिए । चार ओभरमा उनले ३७ रन खर्चिए । मिलिन्द कुमार र सन्तोष यादवले समान एक विकेट लिए ।
