काठमाडौं : सिद्धार्थ बैंक नेपाल प्रिमियर लिग (एनपीएल)मा सुदूरपश्चिम रोयल्स प्लेअफ पुग्ने पहिलो टोली बनेको छ । शनिबार जनकपुर बोल्ट्सलाई हराउँदै लगातार पाँचौ जित निकालेसँगै सुदूरपश्चिमले लिग चरणमा दुई खेल बाँकी रहँदै शीर्ष–४ मा स्थान पक्का गरेको हो ।
कीर्तिपुरस्थित टीयू क्रिकेट मैदानमा जनकपुरले दिएको १४६ रनको लक्ष्य सुदूरपश्चिमले १७.४ ओभरमा ४ विकेट गुमाउँदै पूर्ण गर्यो । इशान पाण्डेले ३५ बलमा ५ चौका र १ छक्कासहित ५६ रन बनाए । विनोद भण्डारीले ४९ बलमा ४२ रन र हर्मित सिंहले १० बलमा अविजित २५ रन जोडे ।
बलिङतर्फ जनकपुरका माज सदाकतले २ विकेट लिए । लगातार चौथो हारसँगै जनकपुर प्लेअफ दौडबाट लगभग बाहिरिएको छ । अब बाँकी ३ खेल सबै जित्नुका साथै अन्य नतिजा पनि आफ्नो पक्षमा आउनुपर्नेछ ।
यसअघि टस जितेर ब्याटिङ गरेको जनकपुरले सञ्जय कृष्णमूर्तिको ५० रनको साथमा ८ विकेट गुमाएर १४५ रन बनाएको थियो । सुदूरपश्चिमका अविनाश बोधरा ४, स्कट कुगेलेइन ३ र कप्तान दीपेन्द्रसिंह ऐरीले १ विकेट लिए ।
