काठमाडौं : दोस्रो संस्करणको नेपाल प्रिमियर लिग (एनपिएल) का सबै ३२ खेल अब डिसहोम गो मोबाइल एपमार्फत हेर्न सकिने भएको छ । आगामी १ देखि २७ मंसिर २०८२ सम्म कीर्तिपुरस्थित त्रिभुवन विश्वविद्यालय क्रिकेट मैदानमा हुने एनपिएलका सम्पूर्ण खेलहरू ‘डिसहोम गो’ एपमा प्रत्यक्ष प्रसारण हुनेछ ।
नेपाल क्रिकेट संघ (क्यान)ले डिस मिडिया नेटवर्कलाई ओटीटी प्रसारण अधिकार प्रदान गरेको छ । दर्शकहरूले एपमार्फत खेल हेर्न छुट्टै शुल्क तिर्नुपर्नेछ । क्यानले तोकेको मूल्यअनुसार, एनपिएलको दोस्रो संस्करणका सबै खेल डिसहोम गो एपबाट हेर्नका लागि नेपालका दर्शकले ३०० रुपैयाँ, मिडिल इस्टका दर्शकले ५०० रुपैयाँ र अन्य देशका दर्शकले १० अमेरिकी डलर तिर्नुपर्नेछ । एप र वेबसाइटबाट लाइभ खेल हेर्दा विज्ञापनरहित रूपमा प्रसारण हेर्न सकिनेछ ।
दोस्रो संस्करणको एनपिएलका खेलहरू युट्युबमा भने प्रत्यक्ष प्रसारण नहुने भएको छ ।
