डोल्पा : डोल्पाको साइजोल क्षेत्रमा वर्ल्डलिंकको इन्टरनेट सेवा दुई सातादेखि पूर्ण रूपमा अवरुद्ध हुँदा स्थानीय कार्यालय, विद्यालय, स्वास्थ्य चौकी र होटल व्यवसायीहरू मारमा परेका छन् ।
कर्णाली प्रोजेक्टअन्तर्गत सञ्चालित सो वाइफाइ सेवाबाट साइजोलका माध्यमिक विद्यालय, स्वास्थ्य चौकी र करिब ३० भन्दा बढी होटल तथा कार्यालयहरू जडानमा रहेका थिए । हरेक प्रयोगकर्ताले मासिक करिब ४ हजार रुपैयाँ बुझाउँदै आएका छन्। तर पछिल्ला १४ दिनदेखि सेवा पूर्ण रूपमा ठप्प भएपछि दैनिक कार्य अवरुद्ध भएको स्थानीयहरूको गुनासो छ ।
स्थानीय व्यवसायी तेजेन्द्र गुरुङले असन्तुष्टि जनाउँदै भने, “पटक–पटक मर्मतका लागि अनुरोध गर्दा पनि कम्पनीतर्फबाट कुनै प्राविधिक टोली आएको छैन ।”
होटल सञ्चालक टसी गुरुङले भने, “हामीले अग्रिम बिल तिर्छौं, तर इन्टरनेट नआउँदा कार्यालयका काम रोकिएका छन् र पर्यटकहरूलाई समेत ठुलो असुविधा भएको छ ।”
सेवा बन्द हुँदा विद्यालयको अनलाइन शिक्षण, स्वास्थ्य चौकीको सूचना आदान–प्रदान, होटल बुकिङ प्रणाली र आगन्तुक सेवामा प्रत्यक्ष असर परेको छ ।
स्थानीयवासीले सम्बन्धित निकाय र वर्ल्डलिंक कम्पनीलाई शीघ्र प्राविधिक टोली पठाई मर्मत कार्य तत्काल गर्न माग गरेका छन् । उनीहरूले पटक–पटक इन्टरनेट जाने र प्राविधिक सहयोग नपाइने समस्या स्थायी रूपमा समाधान गर्न आग्रह गरेका छन् ।
